Leytenant Mirzəyev Nizam Nəsib oğlu

 1920-ci ildə Zərdab rayonunun Əlvənd kəndində anadan olmuşdur. 1942-ci ilin fevral ayından Ordu sıralarına çağırılmışdır. 1942-ci ilin avqust ayında 151-ci atıcı diviziyanın 683-cü atıcı polkunun bölmə komandiri olaraq cəbhəyə yollanmışdır. 1942-ci ilin avqust ayından 1943-cü ilin mart ayına qədər Zaqafqaziya cəbhəsində, 1943-cü ilin oktyabr ayına kimi isə Cənub cəbhəsində döyüşmüşdür.

 20 oktyabr 1943-cü il tarixdə Ukraynanın Zaporojye vilayətinin Moloçnaya çayı yanında döyüşlər zamanı  Nizam Mirzəyevin kəşfiyyat dəstəsi Boqdanovka kəndi yaxınlığında mövqe tutaraq, düşmənin bir ştab zabitini və səkkiz əsgərini əsir götürmüşdülər. Mirzəyev düşmən zabiti tərəfindən yaralanmış və hospitala göndərilmişdir.

 Müalicə olunduqdan sonra, 1944-cü ilin yanvar avqust aylarında 1-ci Ukrayna cəbhəsində vuruşmuş, may ayında ikinci dəfə yaralanmışdır. 1944-cü ilin avqust noyabr aylarında Ukraynada, 1944-cü ilin noyabr ayından 1945-ci ilin yanvar ayına kimi 2-ci Ukrayna cəbhəsində, daha sonra isə 3-cü Ukrayna cəbhəsində döyüşmüşdür. Burada  üçüncü dəfə yaralanmışdır.

 1944-cü ilin qışında xidmət etdiyi 151-ci atıcı diviziya Ukraynanın Vinnitsa vilayətinin Çaqov və Vladimirovka kəndləri yaxınlığında mövqe tutmuşdur. Kiçik leytenant Mirzəyev şəxsən özü 3 dəfə “dil” arxasınca kəşfiyyata yollandı. 15 fevral 1944-cü il tarixdə düşmənin güclü pulemyot atəşi altında alman zabitini öldürərək sənədlərini ələ keçirdi.

 1944-cü il 17 fevral gecəsində Mirzəyev, baş serjant Malışev, serjant Ledovskoy və döyüşçü Zverev düşmənin güclü pulemyot atəşi altında alman unter zabitini əsir götürərək polk ştabına çatdırdılar. Alman zabitindən düşmənin müdafiə sistemi haqqında çox dəyərli məlumatlar əldə edilmişdir. 20 fevral 1944-cü ildə 1 saylı əmr ilə Nizam Mirzəyev “Qırmızı Ulduz” ordeni ilə təltif edilmiş və ona leytenant rütbəsi verilmişdir.

 05 aprel 1945-ci il tarixdə Avstriya  Macarıstan sərhədində, Fyurstenfeld şəhərinin şimal şərqində yerləşən Badersdorf kəndi uğrunda gedən döyüşlər zamanı, düşmən böyük qüvvə ilə 683-cü polkun ştabı yerləşən,  Badersdorf kəndinin şimal şərqindəki Voppendorf kəndinə hücum etdi. Leytenant Mirzəyev düşmənin güclü artilleriya, minamyot və pulemyot atəşlərinə baxmayaraq, bölməsini hücuma qaldırdı və düşməni geri çəkilməyə məcbur etdilər. Nizam Mirzəyevin Badersdorf kəndi kənarında mövqe tutan bölməsi gün ərzində düşmənin əsas polkunun üç əks hücumunu dəf etdi. 10 aprel 1945-ci ildə, 23 saylı əmr ilə leytenant Mirzəyev “2-ci dərəcəli Vətən müharibəsi” ordeni ilə təltif edildi.

 Leytenant Mirzəyev Qələbəni Praqada qarşıladı. 1985-ci ildə, Qələbənin 45 illik yubileyi ərəfəsində “1-ci dərəcəli Vətən müharibəsi” ordeni ilə təltif edilmişdir.

    Hazırladı: Bəxtiyar Əsədli