Yoldaşlarının həyatını xilas edən pulemyotçu ata və yanğınsöndürən oğul

Ramiz Kərimovun atası İsrail Kərimov müharibə veteranı idi. 1919-cu ildə anadan olan Kərimov İsrail Abdul oğlu, 1942-ci ildə cəbhəyə yollanıb. 121 saylı atıcı diviziyasının 383-cü polkunda xidmət edib. Rütbəsi baş serjant olan İsrail Kərimov pulemyotçular bölməsinin komandiri olub. 1943-cü ildə, döyüşlərin birində, hücuma keçən piyadaların irəliləməsinə düşmən qüvvələri mane olurdu. Hücuma keçənlərin az itki verməsini təmin etmək məqsədilə, İsrail Kərimov pulemyotunu önə çıxarmış və dəqiq atəşlər ilə iyirmiyə yaxın düşmən zabit və əsgərini məhv etmişdir. Göstərdiyi qəhrəmanlıqlara görə, 03.09.1943-cü il tarixdə “İgidliyə görə”, 09.05.1945-ci il tarixdə isə "1941-1945-ci illər Böyük Vətən müharibəsində Almaniya üzərində qələbəyə görə" medalları ilə təltif olunmuşdur.

Ramiz Kərimov 1954-cü ildə Zərdab rayonu Şəftəhal kəndində anadan olub. Orta təhsilini bitirəndən sonra hərbi xidmətə yollanıb. 1974-cü ildə hərbi xidmətdən qayıtdıqdan sonra, Moskva Kooperativ İnstitunun Bakı filialının qiyabi şöbəsinə daxil olub. Həmin ildən 4 saylı “Dəmir-beton” trestində işləməyə başlayıb. 1976-cı ildə komsomol göndərişi ilə Bakı şəhər yanğınsöndürmə hissələrinə göndərilib. İlk fəaliyyətinə 04 iyun 1976-cı ildə zavodların birində baş verən yanğını söndürməklə başlayıb.

06 mart 1977-ci il, saat 14.51-də növbətçi hissəyə məlumat daxil olur. Qaz boru kəmərində yanğın başlamışdır. Yüksək gərginlikli elektrik xətti qırılmış və qaz kəmərinin üstünə düşərək qığılcım yaratmışdır. Təsadüfən boru kəmərinin elə bu hissəsində qaz sızması olub və yanğın başlamışdır. Yaxınlıqda neft emalı zavodu və yaşayış binaları yerləşirdi, yanğının qarşısı təcili alınmalı idi. Yanğını söndürmək üçün göndərilən 4 nəfərlik birinci bölmənin tərkibində Ramiz Kərimov da var idi.

Qaz kəmərində baş verən yanğının qarşısının alınmasında Ramiz və yoldaşları əsil fədakarlıq nümayiş etdirdilər. Yanğınsöndürmə maşını su doldurmaq üçün qayıdarkən, faciənin miqyasını başa düşən Ramiz və iki yoldaşı hadisə yerində qalırlar. İstiyə və yüksək təzyiqə tab gətirməyən kəmər partlamış, alovlanan qaz Ramiz və yoldaşlarını əhatə etmişdir. Ramiz alovlar arasından yoldaşlarına yol açmış və onların həyatını xilas etmişdir. Təəssüf ki, özü alovların arasından çıxa bilməmişdir. Həkimlərin səyinə baxmayaraq, Ramiz Kərimov 1977-ci ilin mart ayının 6-sında 7-sinə keçən gecə vəfat etmişdir.

Ölümündən sonra “Qırmızı Ulduz” ordeni ilə təltif olunub. 1982-ci ildə Bakı şəhərinin Nizami rayonunda yerləşən parkların birində qəhrəmanın büstü qoyulub. Büstün üzərindəki xatirə lövhəsində adı, soyadı, təvəllüdü və vəfat etmə tarixi ilə yanaşı, “Xidməti vəzifəsini yerinə yetirərkən qəhrəmancasına həlak olmuş yanğınsöndürən” sözləri yazılıb. Anadan olduğu Şəftəhal kəndində də qəhrəmanın büstü qoyulub.

Keçən əsrin 70-ci illərin sonralarında bəstəkar Süleyman Ələsgərov, Əli Vəkilin sözlərinə solist və simfonik orkestr üçün “Ramiz Kərimov haqqında ballada” bəstələmişdir. Bu əsər Rauf Adıgözəlovun ifasında böyük rəğbətlə qarşılanmışdır.

Zərdab şəhərindəki küçələrinin biri Ramiz Kərimovun adını daşıyır.