1578-ci ildə
Səfəvilər və Osmanlılar arasında baş verən savaş tarixə “Qoyun keçidi” savaşı
kimi daxil olmuşdur. Osmanlı mənbələrinin bildirdiklərinə görə, “Qoyun keçidi”
savaşı günümüzdəki Mingəçevir dənizinin yerləşdiyi bölgənin şimalında, Kür,
Qanıx və Qabirri çaylarına yaxın bir bölgədə baş vermişdir. Bu savaşın müasir
Gürcüstanda, Vaşlovani Milli
Parkının yerləşdiyi ərazidə baş verdiyini də yazırlar.
1555-ci ildə
Osmanlı imperatorluğu və Səfəvi dövləti arasında imzalanan sülh sazişi 1578-ci
ildə pozuldu və osmanlılar Səfəvilər dövlətinin ərazisinə hücum etdilər. Tiflisdən
yola çıxan Osmanlı ordusu ilk öncə Qabirri (İori) çayını keçmiş, bu çayla Qanıx (Alazan) çayları arasındakı
Şırak düzünə daxil olmuşdular. Ordu osmanlı mənbələrində “Şirvan hüdudu”,
“Şirvan qapısı” adlanan Qanıx çayı boyunca irərilədilər. Daşqın səbəbindən
bir-neçə gün Qanıx və Qabirri çayları arasındakı yarımadada düşərgə saldılar. Osmanlı
ordusu Qanıx və Qabirri çaylarının arasındakı bölgəyə çatdığı zaman, Səfəvilərin
Təbriz hakimi Əmir xan 20 min nəfərlik bir ordu ilə Qarabağda yerləşmişdi. Kür
çayı sahillərinə gələn Əmir xan, qüvvələrini Qabirri və Qanıx çaylarının birləşdiyi
nöqtəyə yaxın bir yerdən, “Qoyun ölümü” keçidindən qarşı sahilə keçirdi. “Qoyun
ölümü” keçidinin Ərəş və ya müasir Zərdab rayonunun ərazisində yerləşdiyi
bildirilir. Qaynaqlarda Kür çayı bəzən “Qoyunkeçidi” çayı şəklində də keçməkdədir.
Həm Səfəvi, həm
də osmanlı mənbələrində “Qoyun ölümü” keçidinin adına rast gəlinir. Müəllifinin
kimliyi tam bəlli olmayan “Sahibqiran xaqanın dünyanı tutması” əsərində Şah
İsmayılın Kürü keçməsi təsvir edilir. Əsərdə yazılır ki, Şah əmrinə əsasən
Bayram bəy Qaramanlı o biri sahildə mühafizə təşkil etmək məqsədilə Kür çayı
sahilinə göndərilmişdir. Bayram bəy orada olan iki keçidin heç birini ordunun
keçməsi üçün münasib hesab etmədi. Adamlarını iki dəstəyə ayırır,
ucsuz-bucaqsız çaydan keçmək üçün vasitələr axtarmağa göndərir. Əsgərlərin bəziləri
sal, bəziləri isə gəmi və bərə hazırlamağın fikrinə düşmüşdülər. Kür sahilinə, “Qoyun
ölümü” keçidinə gələn Şah İsmayıl isə atını çaya sürür. Ordu da heç tərəddüd
etmədən onun arxasınca atlarına suya salırlar və onların hamısı sağ-salamat
çaydan keçirlər.
Qaynaqların
yazdığına görə, Şirvanşaha cəsusluq edən bir xəbərçi Şirvan üzərinə irəliləyən
Şah İsmayıl haqqında bilgi vermişdir. Verilən xəbərə görə Səfəvilər “Qoyun
ölümü” keçidindən Kür çayını keçərək Şirvana daxil olacaqdılar.
Oqtay Əfəndiyev
“Azərbaycan Səfəvilər dövləti” əsərində yazır ki, Gürcüstan yürüşündən qayıdan
Şah Təhmasib Gəncədən keçdi, Yevlax adlanan yerdə dayandı. Zilhiccənin 11-də
(fevralın 2-də) “Qoyun ölümü” keçidinin yanında Kürü keçdi və Ərəşi ötərək Əli Şabana
(bəzi mənbələrdə Ali Çobana) gəldi.
Krım
tatarlarının Mollahəsən yaxınlığında darmadağın edilməsindən də yazan Oqtay Əfəndiyev,
Mirzə Salmanın və əmirlərnin Qarabağdan
təcili hərəkətə başladıqlarını və “Qoyun ölümü” keçidindən Kürü keçərək Şirvana daxil olduqlarını yazır.
1578-ci ildə
Osmanlıların Şirvana hücumu zamanı, Kür çayını keçən və sayca az olan Səfəvilər
müharibə üçün əlverişsiz bir ərazidə basqın edərək Osmanlıları məğlub etmək istəyirdilər.
Səfəvilər ilk olaraq ərzaq axtaran öndə olan birliklərə və heyvanları yemləyən
dəstələrə, daha sonra əsas Osmanlı ordusunun üzərinə hücum etdilər. Səfəvi
ordusunun ön hissələrinin hücumu xəbərini alan Lələ Mustafa Paşa ordusunu hərəkətə
keçirdi.
Lələ Mustafa
Paşa dərhal əyalətlərdən topladığı əsgərləri, Diyarbəkr bəylərbəyi Dərviş
Paşanın, Qaraman bəylərbəyi Mehmed paşanın, Ərzurum bəylərbəyi Bəhram Paşanın,
Hələb bəylərbəyi Mehmed Paşanın və Özdəmiroğlu Osman Paşanın başçılıq etdiyi
birlikləri Səfəvilərin üzərinə göndərmiş, özü isə bir qədər geridə qalmışdı.
Osmanlı ordusu tərəfindən sıxışdırıran Səfəvi ordusu tab gətirməyərək Kür çayına doğru geri çəkildilər.
Əmir xan və əsgərləri keçiddə qaldıqları üçün geri çəkilə bilmişdilər. Amma
oğlu Muğan hakimi Murad xanın rəhbərliyi ilə irəli göndərdiyi dəstə geri çəkilərkən
keçidi tapa bilməmiş, Osmanlıların sıxışdırmaları səbəbindən çaya atılmışdılar.
Murad xan da daxil olmaqla səfəvi əsgərlərinin əksəriyyəti Kür çayında
boğularaq həlak olmuşdular. Osmanlı mənbələri savaşda səfəvilər tərəfindən 5000
nəfərin öldürüldüyünü, 5000 nəfərin yaralandığını və geri çəkilənlərin Kür
çayında boğulduğunu yazsa da, öz itkiləri haqqında məlumat vermirlər.
“Qoyun keçidi”
savaşı zamanı Səfəvi ordusunu məğlub edən Osmanlı birlikləri Qanıx nehrinin kənarında
cəmlənmişdilər. Şəki şəhərinə göndərilən birlikdən şəhərin ələ keçirilməsi xəbəri
də gəlmişdir. Daha sonra ordu hərəkətə keçərək Ərəş şəhərinə girdi. Osmanlılar
Ərəşdə ordu üçün bir qala inşa etdikdən sonra Şamaxı və ətrafını ələ keçirdilər.
Osmanlılar ələ keçirdikləri Şirvan və Dağıstanı birləşdirərək böyük bir bəylərbəyliyi
yaratdılar və Özdəmiroğlu Osman Paşa Şirvan bəylərbəyi təyin olundu.
Bəxtiyar Əsədli
Hiç yorum yok: