Zərdabın yaxın tarixi xəbərlərdə: iyun, 2009-cu il

Zərdabda nələr olub?  

  Zərdabın yaxın tarixini zardab.com.az-ın arxivində qorunub saxlanılan xəbərlər əsasında araşdırmaqda davam edirik. Təqdim etdiyimiz bu məlumatlarda kəndlərimiz, zərdablılar haqqında məlumatlar əks olunub. 
   Xatırlatmaq istərdik ki, əvvəlki yazılarımızda "Əkinçi" və digər mənbələrdən müxtəıif dövürlərə aid olan Zərdab xəbərlərini sizinlə bölüşmüşdük. Növbəti məlumatlar 2009-cu ilin iyun ayına aiddir.

/03.06.2009/ Zərdab gəncləri arasında intellektual oyun keçirildi 

  15-25 may 2009-cu il tarixlərində Zərdab rayonunda gənclər arasında intellektual oyun keçirilib. "Gəncliyə Dəstək" İctimai Birliyinin təşkilatçılığı ilə keçirilən tədbirə ümumilikdə 16 komanda qatılıb. Bu barədə www.zardab.com.az-a təşkilatın sədri Eldar Xəlilov məlumat verib. Eldar Xəlilovun sözlərinə görə, 1 saylı orta məktəbin akt zalında keçirilən intellektual oyunun final mərhələsinə 4 komanda vəsiqə qazanıb: "Onlardan I yeri "786" komandası, II yeri "Titanik" komandası, III yeri "Azərbaycan" komandası, VI yeri "Zet" komandası tutublar. 

Tədbirin sonunda "Gəncliyə Dəstək" İctimayi Birliyinin sədiri Eldar Xəlilov və idarə heyətinin üzvü Zamiq Abdullayev qalib komandalara diplomlar və qiymətli hədiyyələr veriblər. 
/05.06.2009/ Məktəb-liseydə son zəng 

Illlərlə müxtəlif ölkələrdə ayrı- ayrı formalarda qeyd olunan son zəng tədbiri bu il də həmişə olduğu kimi respublika miqyasında çox təntənəli şəkildə qeyd olundu. Bu tədbirin təntənəsi Zərdab rayondan da yan keçmədi. Rayonun bütün məktəblərində son zəng tədbirinə çox yüksək səviyyədə hazırlıq işləri görülmüşdü. 30 may 2009 cu ildə rayonun 28 orta məktəbində 625 nəfər məzun son zəng tədbiri keçirildi. Zərdabi adına məktəb-liseyin tarix müəllimi Zamiq Abdullayevin www.zardab .com.az-a verdiyi məlumatda son zəng tədbirlərinin bu təhsil ocağında yüksək səviyyədə təşkil olunduğu qeyd olunub. Z.Abdullayevin sözlərinə ğörə tədbir günü məktəbin qonağı olan Rayon Icra Hakimiyyətinin Başçısının müavini A.Səfərov, şəhər İN H.Kərimov və RTŞ-nin numayəndəsi G.Novruzova öz çıxışlarında tədbiri belə yüksək səviyyədə təşkil etdikləri üçün məktəb-liseyin direktoru T.Ağayevə, məktəbin müəllimlərinə və məzunlara təşəkkür ediblər. 

Tədbir ənənəvi olaraq “son zəng”in çalınması ilə başa çatıb. 

/10.06.2009/ Yeni Azərbaycan: "Zərdab rayonu yüksək templə inkişaf edir" 

Bir neçə gün öncə (06.06.2009) "Yeni Azərbaycan" qəzetində Prezident İlham Əliyevin imzaladığı "Azərbaycan Respublikası regionlarının sosial-iqtisadi inkişafı Dövlət Proqramı" (2004-2008) çərçivəsində son 5 ildə Zərdab rayonunda görülmüş işlərə həsr edilmiş məqalə dərc olunub. Məqalədə proqram çərçivəsində son illər Zərdabda görülən quruculuq, abadlıq işlərinə toxunulub. "Yeni Azərbaycan" qəzetində dərc edilən həmin yazıda qeyd olunur ki, Dövlət Proqramının icrası Zərdab rayonunun da həyatında mühüm yeniliklərlə müşahidə edilib. Məqalədə Zərdabda pambıqçılıq və baramaçılığın, heyvandarlığın və quşçuluğun, suvarma-drenaj şəbəkələrinin, aqrotexservis xidmətinin, təhsilin, su təchizatı və kanalizasiya sisteminin, nəqliyyat infrastrukturunun, əhalinin elektrik enerjisi və qazla təminatının, səhiyyənin inkişafından bəhs edilir. Məqalə bu fikirlərlə yekunlaşır: "Zərdablılar hər zaman ölkəmizdə Prezident İlham Əliyevin rəhbərliyi altında aparılan inkişaf prosesində fəal yer tutmağa çalışır. Rayon sakinləri inanır ki, ölkəmiz Prezident İlham Əliyevin rəhbərliyi altında daha böyük uğurlara imza atacaq". 

/19.06.2009/ İrəvan Dövlət Teatrının kollektivi Zərdabda "Xilaskar"ı səhnələşdirib 

Cəfər Cabbarlı adına İrəvan Dövlət Azərbaycan Teatrının kollektivi bugünlərdə 15 iyun Milli Qurtuluş Günü münasibətilə Zərdab rayonunda qastrol səfərində olub. Qonaqlar və ictimaiyyət nümayəndələri əvvəlcə ümummilli liderin adını daşıyan Heydər Əliyev parkında olub, onun büstünü ziyarət edib, önünə gül çələngləri qoyublar. Daha sonra onlar Zərdab Mədəniyyət Evinin səhnəsində Aqşin Babayevin "Xilaskar" əsərini səhnələşdiriblər. Qeyd edək ki, "Xilaskar" əsərində müəllif ötən əsrin 90-cı illərində respublikamızda yaranmış ziddiyyətli hadisələri, ümummilli lider Heydər Əliyevin siyasi fəaliyyətini və xilaskarlıq missiyasını göstərməyə çalışır. O dövrün tarixi və Milli Məclisin stenoqramı əsasında hazırlanmış bu tamaşa ulu öndərin anadan olmasının 86-cı ildönümünə həsr edilib. Tamaşanın quruluşçu rejissoru əməkdar incəsənət xadimi "Qızıl Dərviş" mükafatı laureatı Oruc Qurbanovdur. Ulu öndər Heydər Əliyevin bədii obrazını səhnədə çox ustalıqla yaradan əməkdar mədəniyyət işçisi, İrəvan Teatrının direktoru İftixar Piriyevdir. On illik fasilədən sonra yenidən səhnəyə qayıtmış İftixar Piriyevin bu rolu ulu öndərin parlaq obrazının səhnəyə gətirilməsi istiqamətində atılmış ilk yaradıcılıq nəailiyyəti sayıla bilər. 

/22.06.2009/ "Kamaz"ın altında qalaraq öldü 

Geofiziki Elmi Tədqiqat İnstitutunun işçisi Xəlil Qurbanov Zərdab rayon Dəkkəoba kənd sakini Faiq Hüseynova məxsus "Kamaz" markalı maşının təkərləri altında qalaraq ölüb. www.zardab.com.az-ın xəbərinə görə, bu barədə Daxili İşlər Nazirliyi (DİN) məlumat yayıb. Hadisə Zərdab rayonunun Dəkkəoba kəndində baş verib. Daxili İşlər Nazirliyinin məlumatında Xəlil Qurbanovun "Kamaz"ın altında gündən qorunmaq məqsədilə dincəldiyi qeyd olunur. Bundan xəbərsiz olan sürücü maşını hərəkətə gətirib və Xəlil Qurbanov təkərlərin altında qalaraq dünyasını dəyişib. Faktla əlaqədar araşdırma aparılır. 

/22.06.2009/ Zərdabda istedadlı gənclərlə görüş olub 

İyunun 19-da Zərdab rayonunda Heydər Əliyev parkında orta məktəb məzunları və istedadlı gənclərlə görüş keçirilib. www.zardab.com.az-ın məlumatına görə, tədbir Zərdab rayon İcra Hakimiyyətinin təşəbbüsü və dəstəyi ilə ərsəyə gəlib. Tədbirdə rayon İcra Hakimiyyətinin başçısı Lütvəli Babayev də iştirak edib. Tədbirdə istedadlı gənclərə müxtəlif hədiyyələr verilib. Tədbirin sonunda istedadlı gənclərin konserti olub. 

/01.06.2009/ Dünyanı uşaqlara verək 

Respublikamızda 2009-cu ilin uşaq ili elan edilməsi uşaqlara olan diqqət və qayğını daha da artırmışdır. "Uşaq ili" şərəfinə Zərdab uşaq incəsənət məktəbində bir-birindən maraqlı tədbirlər keçirilir. İlk belə tədbir bu ilin fevral ayında məktəbin şagirdlərinin hesabat konserti olmuşdur. Həmçinin may ayının 15-də şəhər mədəniyyət evində şagirdlərin böyük konserti keçirilmişdir. İyunun 1-də isə uşaq incəsənət məktəbi "Dünyanı uşaqlara verək" adlı ədəbi-bədii məclis təşkil etməyi planlaşdırır.